Gilmar "Pik" Pisas

Kriminalidat tin Kòrsou un biaha mas den su gara

Kriminalidat tin Kòrsou un biaha mas den su gara, atrako i asesinato ta órden di dia, abitantenan no tin trankilidat ni seguridat den nan propio kas

Otro kaso di asesinato i nos Minister di Hustisia morto na soño i/òf e ta di biahe, miéntras ku aki na Kòrsou kriminalidat ta bati pueblo di Kòrsou di tur forma. Ayera otro kaso di asesinato i e forma ku a haña e kurpa sin bida ta duna tur indikashon ku krímen organisá na nivel haltu a drenta den nos sosiedat.

E forma ku a hòrta e bankomátikonan, tur esakinan ta motibunan pa tin un grado haltu di preokupashon serka Minister Girigorie. Pero pueblo di Kòrsou no ta skuchando nada di e Minister. E ta “Muisstil”.

Tur hende ta mira ku Kòrsou ta pasando un biaha mas den un situashon di insiguridat, atrako, asesinato i robo ku a bin ta dominá Kòrsou, ku komo konsekuensia ku abitantenan ta sinti nan mes insigur te hasta den nan propio kas.

Kuerpo polisial ta enfrentá hopi reto ku ta hasi ku nan no por ehersé nan trabou di protehé i sirbi komunidat. Tin eskases di outonan polisial pa patruya, no tin sèn ni pa kumpra piesa pa drecha e outonan. No tin sufisiente personal den kuerpo polisial pa kubri tur e trabounan ku mester wòrdu ehersé.

Sinembargo Minister di Hustisia ta pretendé ku kriminalidat a baha i ku su ministerio tin kriminalidat bou di kontrol. Riba papel ta masha fásil pa hunga ku sifra i presentá un senario ku no ta e realidat ku ta biba den nos komunidat.

Miéntras ku pueblo di Kòrsou ta sklama pa trankilidat i seguridat tantu riba kaya komo den nan kas. A yega ora pa Minister Girigorie bin Parlamento ku plannan konkreto kon e ta bai atendé ku e ola di kriminalidat ku Kòrsou ta pasando aden.

Minister Girigorie, asina aki no por sigui laga pueblo di Kòrsou sinti i mira ku bo ta nan Minister di Hustisia.

Atentamente,

Gilmar “Pik” Pisas
Lider di Frakshon den
Parlamento pa MFK

Webmaster

Leave a Reply

Your email address will not be published. Required fields are marked *