Gerrit Schotte

E lucha pa kombatí Virusnan i limpia Kòrsou ta kontinuá, Mega Limpiesa den bario di Sta. Rosa

E akshon di limpiesa ku Fundashon Gerrit Schotte, MFK, “I Love Curacao Clean” i boluntarionan a inisiá dia 4 di mart último ta kontinuá. Despues ku siman pasa e grupo menshoná a tene akshon di limpiesa na Soto, Kura Piedra i Stenen Koral (e kaminda ku ta kondusí na Sitek) i a laga esakinan limpi, e karavana di limpiesa di nos dushi Kòrsou ta kontinuá.

Manera informá for di inisio di e proyekto aki, esaki ta un akshon pa evitá un brote di Zika manera nos a konosé tempu tabatin e malesa di Chikungunya. E kritiká ku algun kontrinkante kier lansa ku awor ku elekshon ta serka ta hasi limpiesa no ta kuadra ku realidat.

Na momentu ku e 12 parlamentarionan ku ta sostené e gobiernu aki a vota kontra di un moshon pa habri landfill pa un periodo di grasia pa abitantenan por limpia den bisindario di nan kas i depositá e sushi landfill sin ku nan ta wòrdu kobra, MFK huntu ku fundashon Gerrit Schotte a aserka algun kompania lokal i boluntarionan pa tene un akshon di limpiesa i asina garantisá ku e malesa di Zika lo no afektá nos di e forma ku Chikungunya a afektá gran parti di Kòrsou.

Awe nos por mira bek riba un trayekto eksitoso pa ku e akshon di limpiesa aki i ku e malesa di Zika no a afektá Pueblo di Kòrsou. Nos grandinan ta bisa “Prevení ta Mihó ku Kura” i ta p’esei miéntras ku tin koperashon di sektor priva i boluntarionan, Fundashon Gerrit Schotte, MFK, “I Love Curacao Clean” lo kontinuá brinda pueblo di Kòrsou un ambiente limpi i ku ménos posibilidat di malesa.

Barionan ku ya a haña bishita ta, Kustbatterij, Saliña, Otrabanda, Domi Abou, Choloma, Cas Grandi, Steenrijk, Soto i Kura Piedra i Stenen Koral.

E karavana di limpiesa lo kontinuá mayan djaweps i huntu ku boluntarionan, miembronan di parlamento di MFK, nos lo ta presente nan Sta. Rosa pa akinan tambe nos tene un mega akshon di limpiesa. Pero manera nos a informá, mas importante ta pa nos evitá ku sanguranan por tin sitionan kaminda nan por konsentrá i transmití malesanan peligroso pa nos siudadanonan.

Miéntras ku mayan e mesun 12 parlamentarionan ku a ninga un akshon di grasia pa habri landfill, a skohe pa yama un reunion públiko gastando mas ku 20 mil florin di pueblo pa tuma un akshon ilegal pa diskutí den sala di parlamento riba e sentensia den kaso Babel, nos di MFK ta skohe pa sirbi nos komunidat i kontinuá ku e akshon di limpiesa di nos barionan.

Sea den gobiernu òf den oposishon Fundashon Gerrit Schotte i MFK lo kontinuá ku akshon nan ku ta na benefisio di e pueblo di Kòrsou.

Gerrit F. Schotte

 

Webmaster

Leave a Reply

Your email address will not be published. Required fields are marked *