Gilmar "Pik" Pisas

MFK – Gilmar “Pik” Pisas: Hopi palabra ta boroto!

Personal di Obranan Públiko a kumpli ku palabrashon di laga limpia e ruta di Karnaval di Banda Bou na tempu!

E último tres añanan aki, tur aña di nobo, mi persona mester a saka komunikado pidiendo gobièrnu, pa por fabor laga e instansianan konserní pa nan limpia riba tantu e ruta di Karnaval i tambe e áreanan kual outonan ta trafiká den besindario di e ruta. Aña pasá mes práktikamente a bira un káos paso a laga e kontratista limpia te na último momentu,ku nan na nan turno no por a kaba e trabou na tempu, ku a trese komo konsekuensia un stagnashon total di tráfiko, prinsipalmente den e área di Barber.

Kaya Johannes R. Francisco, ku ta di sumo importansia den kaso di emergensia, aña pasá a keda opstakulisá ku tráfiko no por a kore normal debí na e ramanan. Nos tabata di suèltu ku no mester a hasi uso di e kaminda ei den kaso di emergensia, paso vehíkulonan no por a move.

Pa evitá di pasa meskos, mi persona e biaha aki a saka potrèt delantá di e situashon den área di Barber i mi a mustra esakinan na e empleadonan di Obra Públiko i mi a súplikanan ku mi no ta spera ku lo mi mester bolbe saka un komunikado pa bisa ku e kamindanan aki ta intrafikabel pa Karnaval.

Nan na nan turno a bisa ku e biaha aki si nan lo sòru di kumpli trempan pa tantu e ruta i tambe e área di Barber di kual tin mas aglomerashon di hende. Manera nan sa bisa hopi palabra ta boroto, Obranan Públiko, Selikor a laga enbèrdat limpia tantu e ruta, komo e área di Barber manera nan a palabra ku nan lo hasi. Ami ku ta un polítiko ku ta vigilá krítikamente pa ku tur e atenshon ku ta deja di duna e área di Banda Bou. Mester rekonosé esfuerso hasí di banda di e instansianan konserní i mesora felisita nan ku e biaha aki si nan a aktua na tempu manera palabrá.

Pero den mesun rosea mi mester bisa ku lo ta un tristesa na momentu ku outomobilistanan lo mester bai hasi uso di e kamindanan ku ta aneksá riba Kaya Prospero Royer, spesialmente den área di Lelienberg, Bou Barber. Tantu primintimentu te awe nada no a pasa.

Mi no por keda sin menshoná e Kaya Prospero “Popo” Royer mes, kaminda Karnaval lo pasa i tambe e kaminda direkshon Westpunt ku tur dos ta práktikamente intrafikabel.

Minister a bisa tantu e kaya di Weg naar Westpunt komo Kaya Prospero Royer lo wòrdu drechá den aña 2016, pero te ainda nos ta wardando e anunsio. A anunsiá masha hopi proyekto pa e área pariba anto atrobe Banda Bou mester warda. Minister ki ora?

Athuntu algun foto di “before and after”.

Na nòmber di frakshon di MFK.

 

Gilmar “Pik” Pisas

Miebro di Parlamento MFK

Kòrsou, 31 di Yanüari 2016

IMG_0952

Webmaster

Leave a Reply

Your email address will not be published. Required fields are marked *