Gilmar "Pik" Pisas

Gobièrnu ta serando tur servisio na Banda Bou, awor ta bùrt di Ban Bario Bek na Dokterstuin

E gobièrnu aktual riba e trènt aki, Banda Bou ta bai mas ku 40 aña bek den tempu

Movementu Futuro Kòrsou, semper den su vishon a hiba un aserkamentu di ku servisio di gobernashon mes ta mas serka di bo, esaki mester ta mas serka di e pueblo. Esei ta enserá entre otro ku e pueblo di Kòrsou, mester tin un aserkamentu di e instansianan gubernamental mas serka di nan área di biba. Ta p’esei semper ma apresiá e sistema ku Ban Bario Bek nan a funshoná kaminda esnan den nesesidat por a yega ku fasilidat pa yudansa.

E manera ku e gobièrnu aki ta funshonando aktualmente ta netamente kontrali sigur pa ku Banda Bou, paso práktikamente, nan ta mandando tur instansia gubernamental i no gubernamental MAS LEW for di Banda Abou.

No ta nos ta bisa, pero semper enkuestanan a proba ku Banda Bou ta un di e áreanan ku ta lubidá i ku tin problemanan soshal-ekonómiko no atendé kompra ku otro áreanan/barionan na Kòrsou. P’esei tur gobièrnu ku a sinta a sòru semper pa mantené e ban Bario Bek na Banda Bou i asistí ku e situashon soshal di serka. Awor nos a bin komprondé ku e Gabinete Asjes cq. Minister Larmonie di pueblo soberano a tuma e desishon ku ta sera Ban Bario Bek Dokterstuin, mandando e trahadónan otro área, anto den e siman ora di kobra ònderstant ta habrié un ratu pa por paga e klientenan. Un desishon asin’aki ta inaseptabel sigur pa e kantidat di habitantenan ku a aserka mi persona pa vosifera nan opinion.

Enbèrdat ku e kobradónan di ònderstant pa mas fasilidat ta preferá di kobra na Otrobanda paso e ta mas kumbiniente paso nan ta paga 1 bus, pero no ta e servisio ei so, un Ban Bario Bek ta duna. Tin masha hopi problema sosial ku nan ta duna nan aporte. Awor gobièrnu ke bisami ku e hendenan ei pa aserka Ban Bario Bek lo mester bai un otro destinashon for di kaminda nan ta biba. Mi no ta kere esaki mester ta e intenshon di e gobièrnu aki.

Ya a sera diferente instansia sera aki na Banda Abou, awor Ban Bario Bek tambe lo sera su porta. Ku otro palabra no opstante ku e kantidat di Habitantenan a subi na mas di 13,000+ habitante, nos ta bai bek na e situashon di 40-50 aña patras kaminda ku muchanan di Kunuku ta tin ku sali bai Stat pa haña servisionan di gobièrnu, kaminda nan ta paga e mesun belasting ku tur otro hende.

Paga mesun belasting ku tur otro habitante anto nos ta priva di bon servisio i señal di TDS, UTS (mobil) mayoria radio FM ta drenta malu. Nos ta haña entre otro Sentro Di Bario nan defisiente, kareteranan malisimo, terenonan deportivo ku no por wòrdu uza, aserka ta bin ku ta sera tur pero tur instansia na Banda Bou awe aña 2015.

Si ta aksesibilidat pa yega Ban Bario Bek Dokterstuin ta difísil ta e problema no ta nada, pone e ora ei un kaminda sentral por ehèmpel na Tera Kòrá. Pero no por dal e porta nan ser asina sin mas. Reorganisá e servisio pa habitantenan por yega i wòrdu yuda ku fasilidat manera ántes i no mester tende kada biaha ku gobièrnu no tin sèn. Anto ta gasta sèn nan yen otro kos sin sentido anto ta spar sèn dor di kita nan for di área di Banda Abou.

E trato ku habitantenan di Banda Bou ta hañando aworakí sigur sigur nos no meresé.

1 Botika pa 13,000 hende, anto awor 0 Ban Bario Bek pa 13,000, NO POR!

Gilmar “Pik” Pisas

Miembro di Parlamento

Frakshon di MFK

IMG_2120

Webmaster

Leave a Reply

Your email address will not be published. Required fields are marked *