Gerrit Schotte

Komersiantenan i pueblo di Kòrsou ta sinti efekto negativo di “zonbelasting” ku a wòrdu introdusí dor di Gabinete Asjes na yanüari 2015

E mundu di komersio i tambe habitantenan den nan kasnan ta hañando alternativanan pa kita kompletamente for di Aqualectra pa loke ta trata konsumo di koriente. E término “Off the Grid” ta birando un realidat mas i mas na Kòrsou.

Kisas hopi di nos no ta parando ketu mas na e “zonbelasting” ku Gabinete Asjes a introdusí na kuminsamentu di 2015. E belasting ku mester wòrdu pagá pa kada un kilowòt di koriente renovabel ku un kas di famia òf un negoshi traha ku panelnan solar.

Awe, 3 luna despues, komersiantenan ku a hasi invershonnan grandi den e periodo 2012 pa 2014 (despues ku Gabinete Schotte a implementá un maneho nobo pa loke ta trata energia renovabel na kuminsamentu di 2011) a sinti efektonan sumamente negativo i desastroso riba nan faktura mensual di Aqualectra. Tin vários kompania ku lo no por wanta kabes riba awa mas, pa motibu di e “Zonbelasting di Gabinete Asjes”.

Tin hopi indikashon ku den e próksimo simannan, diferente komersiante lo bai over na nan propio invershon i buska alternativanan ku ya kaba ta aksesibel na Kòrsou. Ku esaki e komersiantenan ke bai “Off the Grid”. Esaki ta nifiká ku e kompania no mester di Aqualectra mas pa por ehèmpel e reserva of para “standby” ku nan koriente karu produsí na momentu ku e panelnan solar riba dak no por produsí sufisiente koriente pa e negoshi riba un dia. Ku otro palabra, komersio na Kòrsou tiki tiki lo bai ta kompletamente independiente di Aqualectra pa loke ta trata konsumo di koriente. Vários di nan ta kla kaba pa “Go Off the Grid”.

Konklushon ku nos di MFK i pueblo di Kòrsou por saka un biaha mas ta ku Gabinete Asjes i gerensha di Aqualectra ainda no tin niun klase di vishon (lokual ya ront mundo a wòrdu adoptá) kon pa mehorá nos mix di produkshon di koriente pa un manera mas renovabel i duradero, ku a lo largo lo benefisiá pueblo di Kòrsou i Komersio ku prèisnan faborabel (kosto di bida i kosto di hasi negoshi pagabel) den e pais aki.

Pa motibunan di negligensha, kabesura i málmaneho di Gabinete Asjes, gerensha di Aqualectra i eks gerenshanan, Aqualectra su futuro ta mustra sumamente negativo.

Gerrit F. Schotte
Lider di Frakshon MFK

jOFF-GRID-SYSTEM

Webmaster

Leave a Reply

Your email address will not be published. Required fields are marked *